Նպատակը՝ Ինքնուրույն, որոնողական աշխատանք, ինքնաբուխ, հետազոտական հմտությունների զարգացում: Համեմատություն կատարելու հմտության զարգացում, հին ժամանակների մշակույթի և սովորությունների իմացությունը, ծանոթացում ծնողների մանկությանն ու առօրյային նույն հասակում, որում իրենք են այժմ: Հետաքրքիր ինֆորմացիայի կուտակում, հավաքագրում, ներկայացում:
1.Ամանորյա ընտանեկան ավանդույթը՝ Ձեր ընտանիքում ինչպիսին է այժմ, և ինչպիսին է եղել Ձեր ծնողների ընտանիքում, երբ նրանք ձեր հասակին էին։
2. Ուտեստներից՝ ինչ ենք այժմ համարում ավանդական ուտելիք, ի՞նչ կա հիմա, որ նախկինում չկար, և ի՞նչ կար հնում, որ հիմա չկա
3. Ինչպիսի՞ նվերներ են ցանկացել Ձմեռ պապիկից ստանալ Ձեր ծնողները, և ինչպիսի՞ն եք ցանկանում դուք, նմանություններն ու տարբերությունները
4. Ամանորյա ձեր ավանդույթը, որը միշտ անխախտ է՝ նստելու վայր, սպասք, երազանք, ուտելիք/որը միշտ դուք եք պատրաստում/
Վերջապես եկավ Ամանորը: Մենք տոնում ենք Ամանորը տատիկիս և պապիկի տանը, որտեղ նաև իմ հորեղբայրն ու քույրերն են լինում: Մեծերը միշտ նվերներ են պատրաստում և նվիրում մեզ Ձմեռ պապի անունից: Մենք խոսում և խաղում ենք մինչեւ 12-ը, իսկ հետո հաշվում ենք ամեն րոպեն՝ կենացներ ասում և հաջողություն ենք մաղթում միմյանց: Օգտվում ենք սեղանի վրա տոնական դասավորած հրաշալի ուտեստներից, ինչպիսիք են խոզի բուդը, քուֆթան, նրբաբլիթները, թխվածքները, փախլավան, տոլման, մրգերը, հյութերը, աղցանները:
Ծնողներիս նոր տարին տարին առանձնապես չի տարբերվել այժմյան նոր տարիներից: Գրեթե բոլոր ճաշատեսակները մշտապես սեղանի վրա էին, բացի խոզի բդից, և անպայման պասուց տոլմա կար, որը մենք չենք սիրում, դրա համար էլ գրեթե չենք պատրաստում: Ձմեռ պապը իրենց նվերներն իրենց բարձի տակ էր դնում, երբ փոքր էին, իսկ իմ և քրոջս նվերները հայտնվում են տոնածառի տակ: Մենք հիմա Ձմեռ պապիկին նամակ ենք գրում՝ մեր ցանկություններից բաղկացած, իսկ ծնողներս նամակ չեն գրել և նվերները նրանց համար իրոք լրիվ անակնկալ են եղել: Մայրիկս ու մորաքույրս բոլոր հարազատների համար շնորհավորական բացիկներ են նկարել և նվիրել, տոնածառի կոտրված խաղալիքներից փայլուն թագեր են պատրաստել պապիկիս հետ միասին ու էլի շատ հետաքրքիր բաներ արել:
Իմ կարծիքով մեր Ամանորը չի տարբերվում ծնողներիս Ամանորից, միակ դրական առավելությունն այն է, որ հիմա կա ինտերնետ և սկայպ որով կարող ենք խոսել ուրիշ երկրում գտնվող բարեկամների և ընկերների հետ և միասին տոնել, թեկուզև մեծ հեռավորության վրա:
Եթե ինձ տրվեր հնարավորություն փոխելու Ամանորը նշելու սովորույթը, ես այն կրկին կթողնեի նույնը՝ Ամանորը, որը նշում եմ իմ հարազատների հետ: Ես չեմ կարող փոխել իմ հրաշալի Ամանորը:
Գոհար Սանոյանի բլոգ 